طريق إلى قلب الرجل ؟؟...ما حدش يقول معدته

أقرب طريق إلى قلب الرجل ؟؟ ... ما حدش يقول معدته ..

قررت زينات أنها تنفذ وتأخذ بنصائح الشيخ بلحة ..
فقررت من اليوم إللى رجعت فيه من عند الشيخ بلحة أنها تغير من معاملتها لزوجها ..

يرجع حسني من عمله منهكاً .. ومن شدة تعبه لم يأخذ في باله أن أصبعه على جرس الباب ..

زينات من داخل المنزل : حاضر حاضر يا إللى بتخبط .. هي الدنيا طارت ولا أيه ..
تتجه نحو الصالة .. وتقول وهى متجهة لباب البيت :

يا إللى على الباب شيل إيدك .. هتحرق جرس الباب .

وتنظر من عين الباب السحرية لتجد أن من يطرق الباب هو زوجها الحبيب حسني ..
تبادر بفتح الباب قائلة :
حبيبي .. أنت جيت .. حمد الله على السلامة
يرد حسني قائلاً: السلام عليكم ورحمة الله وبركاته
ترد قائلة: وعليكم السلام ورحمة الله وبركاته .. نورت يا حبيبي بيتك ..
يرد حسني بإستغراب : ده نور الكهرباء يا زينات .. تلاقيكي وإنتِ بتفتحى الباب شغلتى نور الصالة .. فده بقى نور الصالة .
زينات بخيبة أمل : آه .. تصور فعلاً ده نور الصالة بس ده ما يمنعش أن نورك غطى على نور الصالة ..
حسني : طيب يا زينات نورت نورت .. هتخليني واقف على الباب كتير .. روحى يلا حضري الغدا أنا جعان جداً ..زينات : حاضر حاضر .. ده أنا عمله لك حتى كل الأكل إللي أنت بتحبه ..
حسني : الأكل إللى بحبه .. (ويتذكر كل تجارب زينات الفاشلة في إعداد الطعام لدرجة أنه ما بقى يفرق بين الفراخ والبطاطس .. ) .. ويستطرد قائلاً : ربنا يستر
زينات : بتقول حاجه يا حبيبي
حسني : وأنا أقدر .. يلا حضري الأكل ..
زينات : دقايق ويكون الأكل جاهز ..

وأسرعت زينات إلى مطبخها لتتأكد من أن الأكل أصبح جاهزاً تماماً .. وبعد ما تأكدت من نضجه .. ذهبت إلى حسني في غرفة النوم وقالت له :
حسني إيه رأيك لو أخدت شاور قبل الغدا؟؟
حسني : شاور ..!! وكمان بقيتى تتكلمى لغات حية ؟؟
زينات : حية وميتة وكل حاجة يا حبيبي أهم حاجه أنت بس تكون مبسوط

ينظر إليها حسني مستغرباً فلم تكن هذه زينات زوجته ..

حسني: حاضر شاور شاور .. بس أنتِ بقى ياريت تحضري الغذاء أنا هلكان وجعان ..

ويذهب حسني إلى الحمام وتتجه زينات إلى المطبخ لتعد الغذاء وفي خطوات سريعة جداً بين المطبخ والسفرة أعدت زينات الغذاء في الوقت إللى أخده حسني في الحمام ..
وخرج حسني من الحمام إلى غرفة الطعام لتناول الغذاء وكانت المفاجأة ..
سفرة هائلة إعداد وإخراج زوجته زينات ..

تمتم في سره قائلاٍ : أكيد فيه سر في الموضوع .. ده إنقلاب فظيع كده بين يوم وليله .. يارب عدي اليوم ده على خير ..

وأستعد حسني لتناول الغذاء .. وجلس مع زينات على السفرة ..

زينات: ها إيه رأيك النهارده في الأكل ..
حسني: مش بطال .. بس الأكل النهارده فيه حاجة غريبة غير كل يوم ..
زينات : صنع إيديه وحياة عينية
حسني في سره: صنع إيديكي؟؟ أمال هى الأول كانت بتطبخ بإيه ؟؟
زينات : إيه الأكل مش عاجبك ..
حسني : لالالالا .. إزاي .. هو أنا أكلت في حياتي حاجه أحسن من كده ..
زينات : بحسب ..

حسني .. في خلال الفترة أثناء تناول الغذاء فكر في فكرة هائلة .. فأنه لم يعتاد على زينات زوجته هكذا من قبل .. وعلشان كده بقى قرر أستغلال الفرصة دى .. وزينات وديعة وهادية

حسني : زينات إيه رأيك نخرج النهارده يا حبيبتي؟؟
زينات وهى لا تصدق نفسها : نخرج .. حبيبتي .. !! ده أنا من أيام الخطوبة ما سمعت الكلمتين دول .. أنا هيغمن عليه.. حد يسندنى ..
(( قالت هذه الكلمات في سرها ))
وأستطردت قائلة : يظهر أن الشيخ بلحة نصايحه جت بفايده ..
وردت على حسني قائلة : أكيد طبعاً نخرج .. بس هتوديني فين؟؟
حسني: عند ماما طبعاً يا حبيبتى
وهنا أصابت الصدمة زينات : بقى يوم ما يخرجني يوديني عند حماتي .. لا بجد خروجة ولا أروع من كده ..
حسني: مالك يا زينات سكتي ليه ..؟؟
زينات: من الفرحة يا حبيبي من الفرحة ..
( تقولها وهى تجز على أسنانها )

حسني: طيب خلاص قومي بقى ألبسي ويلا نروح عند ماما ..
زينات : طيب والأكل .. والتعب .. أنت مش من شوية كنت بتقول أنك هلكان وتعبان ..
حسني : لالا .. أكل إيه وبتاع إيه ..

ومن لهفة حسني على رؤية أمه أحست زينات بتقصيرها الفظيع في حق والداته .. فهى عادة ما تقول عنها ( حماتي قنبلة ذرية ) وعلى طول تناقر في حماتها الغلبانة أم زوجها الحبيب .. ودائماً معاملتها ليها معاملة الند بالند .. ودايما بقى تشكى لحسني من أمه (( أمك عملت كذا .. لالا دي كانت قاصدة تحرجني .. هو أحنا كل ما نروح عند أمك لازم نرجع بخناقة .. ويوم ما تكون عارفة وقت زيارة أم زوجها طول النهار ما يكون على لسانها غير هذه الأغنية .. بكرة النكد بكرة ))

فكرت زينات كتير كتير ..وحدثت نفسها قائلة: أمال الناس إللى بتقول أقرب طريق لقلب الرجل معدته دول إيه .. ما أنا طبخت أهوه وعملت أكل وعملتله سفرة ما كان يحلم بيها .. وهو بياكل بيفكر في أمه .. ))
لالا .. الحكمة دى غلط .. أقرب طريق لقلب الرجل مش معدته ..
بس يا ترى إيه أقرب طريق لقلب الرجل .. ؟؟

حسني يقطع حبل أفكارها : زيناااااااااات .. أنتِ رحتي فين .. ياهووووووووووه .. زيناااااااااااات
زينات : أيوة يا حسني .. معاك أهوه .. خلاص هتروح أمته عند ماما ؟؟

حسني : ماما ؟؟ لا أن عرضت عليكِ فكرة أننا نروح عند ماما أنا مش ماما أنتِ ..
زينات : آه ما أنا عارفه .. ماهو الأتنين واحد ..
حسني : الأتنين واحد ..؟؟
هى الست دي في أيامها الأخيرة ولا أيه .. ربنا يستر عليكِ يا زينات ويكملك بعقلك يارب
(يحدث بها نفسه)

زينات : ها هتروح أمته .. أقصد هنروح أمته
حسني : دلوقتى .. إن شاء الله .. ولا أقولك خليها بعد المغرب ..

ومرالوقت من بعد العصر لحد المغرب سريعاً سريعاً .. ولبس كل واحد فيهم هدومه .. أستعداداً للخناقة المرتقبة .. لالا أقصد أستعداد لزيارة والدة حسني ..

ودخل حسني بيت أمه وسارع بتقبيل يدي والدته .. وزينات تنظر إليه نظرات غريبة جداً مليانه دهشة وأستغراب ..
أد إيه كانت قبل كده ما بتاخد في بالها حب حسني لأمه .. وكانت تزود همومه .. وألف خناقة تحصل بعد زيارة أمه .. وكأن أم حسني زوجة حسني الأخري لدرجه أنها أوقات كتير كانت تغير جداً من علاقته بأمه ..
سبحان الله ..

وأسرعت زينات إلى حماتها قائلة : إزيك يا حماتي .. أقصد أزيك يا ماما ؟؟
ردت والدة حسني : أنا كويسة يا زينات .. خير يا ماما مالك هو أنتِ تعبانه ولا حاجة
(( يوووووووه .. هو أنا كل ما هعمل حاجه ألاقيهم بيقولولى أنتِ تعبانة .. ما أنا زي الحصان أهوه .. وأخذت نفس عميق .. لازم أكون هاديه وما أتعصب .. يارب عديها على خير يارب ))

ردت زينات : لا أبداً .. ده أنا كويسة خالص أهوه
والدة حسنى : طيب الحمد لله

وفي الفترة دي بقى قررت زينات أنها ما تخلي أم زوجها تقوم من مكانها كل طلباتها وطلبات حسني ووالده مجابة ..

والدة حسني : أقوم أعملكم شاي ولا عصير
زينات : لا لا يا ماما أرتاحي أنتِ أنا هعمل بدالك .. ها تشربوا شاي ولا عصير .. أنا بقول عصير .. خلاص هو عصير ..

وأسرعت زينات إلى المطبخ من غير ما تستنى رد حد وأعدت للجميع العصير..

والدة حسني : خير يا حسونة .. هى مراتك مالها النهاردة .. أنا مش مطمنه فيه حاجه تقلق
حسني : مش عارف والله يا ماما .. هى متغيرة كده من أمبارح .. بس بقت هادية ولطيفة كده .. ما يمكن تكون دي دعواتك ليه يا أمي أن ربنا يهديها
والدة حسني: وأنا أكرهلك الخير يا حبيبي .. وأنك تكون مبسوط في حياتك .. ربنا يهديكم لبعض يارب
حسني: يارب يا ماما يارب

وأحضرت زينات العصير واستمرت على الوضع ده كل ما حد يطلب حاجة تجرى زينات وتعملها
.. بس يا تري إيه سبب تغيير زينات ده ..
هى ما كانت كده من قبل ..
وحاولت النهارده أنها تجاهد نفسها .. يا ترى إيه السبب؟؟

أنا أقولكم أصل زينات عرفت أن زوجها عمره ما هيسيب أهله وهيعيش لها وحدها بس .. لا .. أهله في المقام الأول .. وبعدين كل الناس في مراتب أقل .. وأن حماتها مش زوجته الثانية .. لا دى أمه وأكتر حد بيحبه .. زي ما هى بتحب أمها وأمها بتحبها .. يعني زينات علشان تخلي زوجها يرضي عنها .. لازم تعامل أهله كويس جداً وتحبهم ويحبوها .. وكفايه عليه هم الشغل والعيشة والظروف .. ما تزود عليه هم خناقاتها مع أمه ..
لذلك بقى زينات الذكية عرفت حاجه مهمة جداً وهى ..

أن أقرب طريق لقلب الرجل .. هى حب زوجته لأهله وأنها تعاملهم معاملة طيبة .. بجد هتكسب حب أهل زوجها .. وحب زوجها وهتوفر عليه كتيرررر جداً ..

.. ويارب يو صلكم هدفي منها

ههههههههههههههههههههه
قصة رائع جدااااااااااااا زي العادة وبكل سعادة
مع اريج مش هتقدر تغمض عنيك

man110 كتب:

ههههههههههههههههههههه
قصة رائع جدااااااااااااا زي العادة وبكل سعادة
مع اريج مش هتقدر تغمض عنيك

ده ع اساس ان روتانا سينما معاك
مرسى لمرورك يا مان

يا جماعه انا من وجهت نظرى ان البنات ممكن تستفاد من الموضوع ده كتير جدا بس ال لاحظته مفيش ولا بنوته علقت عليه

مشكوووووووووره اريج على موضوعك الجميل ده

وتمنياتنا لكى بالتوفيق

تقبلى مرورى

شكرا لمرورك محمد سالم

كلام جميل اوى يااريج تسلم ايدك بس باين كدة البنات مش عجبها الكلام دة

يظهر كده يال احمد
مرسى لمرورك

اى خدمة ياباشا احنا فى الخدمة

تسلمى يا قمر

؟

لالالا عجبنى اللام ياارريج والا تحب حد تحب كل اهلو واقربوا لانوا لو هو بايحب اهلو هى هاتحبهم على حبوا ليهم
وتسلمى على الملعومه والمجهود ياروجه

اسعدنى مرورك

مرسى يا زهره لاهتمامك بالرد

دا علشان انتى اللى منزلها الموضوع ياروحى

اشكرك للمتابعه والمجامله